Ayeri pudiemos disfrutar en Xixón d’una charla bien interesante de Soledad Luque, presidenta de l’Asociación Todos los niños robados son también mis niños. Espunxo les bases ideolóxiques y llegales qu’espliquen el robu de los sos fíos a munches muyeres republicanes preses o internaes n’instituciones nos primeros años de la dictadura y cómo esa práctica, fundamentada na impunidá de los sectores poderosos del Estáu, llegó hasta bien entrada la democracia. Les víctimes pasaron a ser muyeres vulnerables en xeneral. La Llei de Bebés Robaos, qu’agora ta en tramitación nel Congresu, supón una posibilidá real d’investigar la dimensión d’esi drama, d’abrir archivos zarraos pa les víctimes y de demostrar que los más de dos mil casos xudiciales archivaos nos últimos años nun foron casos aislaos, sinón una práctica sistemática y, polo tanto, delitos de lesa humanidá que nun prescriben.
Nel coloquiu posterior hubo intervenciones de cinco muyeres que dieron a conocer los sos casos.