Non, señor Canteli, esto nun ye una dictadura. Podrá criticar el plan d’aforru enerxéticu (cosa que nuna dictadura nun diba poder facer ensin consecuencies pa la so persona) porque-y paeza un abusu o una midida autoritaria…, pero esto nun ye una dictadura. Dictadura foi’l réxime que Franco impunxo depués de dar un golpe d’Estáu contra un Gobiernu democráticu. Y el so partíu sigue ensin condenalo. Nesa dictadura disfrutaben de protección y reconocimientu públicu los asesinos y xenocides qu’usté sigue honrando nes plaques de les cais depués de que’l so partíu reclamare nos tribunales contra la retirada d’esos nomes basada na Llei de Memoria Histórica del 2007. Eses plaques de los qu’apoyaron la dictadura volvió a poneles usté, que se diz enemigu de les dictadures, y ehí siguen. 

Diz que s’opón a una dictadura qu’existe namás na so sobreactuación, pero de los que s’opunxeron a una dictadura de verdá, más de 100.000 siguen nes cunetes y foses comunes, miles y miles viéronse obligaos a marchar de la so tierra pa que nun-yos pasare lo mesmo, miles y miles pasaron peles cárceles y batallones de trabayu ente 1940 y 1975, añu nel que, por orde del dictador Franco (y de dalgunos de los fundadores del partíu qu’agora ye’l Partíu Popular), fusilaron a los últimos cinco. Eso foi una dictadura de verdá, que nun diba de llibertá pa baxar el termostatu sinón de vida o muerte, así que nun banalice les palabres nin xuegue con elles. Tenemos memoria y naide va ser quien a borrala hasta consiguir verdá, xusticia, reparación y garantíes de non repetición.